“Агендата на новата Влада има две траектории. Едната води кон реализирање на итните реформски приоритети а другата кон решавање на отворените политички прашања, како дома, така и со соседите”, изјави денес во Брисел заменик претседателот на Владата задолжен за европски прашања, Бујар Османи.
Тој, заедно со министерот за правда Билен Саљији и министерот за информатичко општество и администрација Дамјан Манчевски, денес се сретна со генералниот директор за проширување Кристијан Даниелсон. Претходно сите учестуваа на Комитетот за стабилизација и асоцијација со ЕУ. Закажана е и следната средба на 18 јули кога ќе се одржи Советот за стабилизација и асоцијација со ЕУ на која ќе присуствуваат комесарот Јоханес Хан и шефицата на ЕУ дипломатијата Федерика Могерини.
„Свесни сме дека имаме голем товар од кој треба да се ослободиме и дека очекувањата на граѓаните сѐ повеќе и повеќе се зголемуваат. Oвој момент на оптимизам не може вечно да трае и ние мора да почнеме да испорачуваме. Тоа е за нас уште поголема обврска, сериозно и трезвено да пристапиме кон надминување на предизвиците на нашиот пат кон ЕУ“, рече Османи.
На внатрешен план потребно е заокружување на легислативниот дел на Охридскиот рамковен договор, како и фактичка примена на инклузивноста во политичкото одлучување.
„Затворањето на овие прашања ние не ги третираме само како обврска преземена пред нашите меѓународни партнери, туку и како значајни предуслови за изградба на функционална демократија, стабилно општество и просперитетна економија. Ваквите комплексни прашања бараат храбри одлуки, за чија реализација потребна е и поддршка од нашите партнери во ЕУ“, истакна Османи.
Македонската делегација ги извести своите бриселски домаќини за посетите на Бугарија и Грција од страна на висока владина делегација и министерот за надворешни работи Никола Димитров.
„Сѐ поизвесно станува потпишувањето на меѓусебниот договор со Бугарија пред крајот на летото, со што Македонија ќе може посуштински да се посвети на унапредување и на односите со Грција. Свесни сме дека се работи за емоционален проблем, но со оглед на успешноста на првите чекори, набргу очекуваме значајни подобрувања на односите меѓу двете Влади и севкупно меѓу двете земји“, истакна Османи.
Владините претставници ветија примена на превземните обврски и побараа поддршка од Даниелсон. Тие би сакале ЕУ да направи конкретни чекори за поддршка и да дадат “импулс и поттик за задржување и засилување на реформскиот и европскиот курс на државата”.