Вицепремиерот Бујар Османи, како национален координатор за распределба на странска помош во земјава, денеска прими донација од Австрија што е обезбедена преку Механизмот за цивилна заштита на Европската Унија како поддршка во борбата со ковид-19. Османи, кој се заблагодари за донацијата, рече дека ова е доказ за добрите билатерални односи меѓу двете држави и грижата што секогаш ја покажува Австрија кон нашата земја на политички план.
„Австрија направи многу во делот на започнување на преговорите, но и за конкретната соработка. Не е прв пат земјава да го ползува Цивилниот механизам на ЕУ за поддршка во време на кризи. Така беше и пред неколку години кога земјава беше соочена со предизвиците од поплавите, што укажува на функционалноста на Цивилниот механизам, како платформа за блиска соработка меѓу земјите од Европа“, истакна Османи.
Но, она што е многу поважно, според Османи, е тоа што за првпат како држава сме третирани како внатрешно прашање на Европската унија.
„Првпат чувствуваме што значи да сме дел од Европската унија. Она што е важно е дека за првпат ние сме третирани како внатрешно прашање на Европската унија, а тоа се случува поради тоа што почнавме преговори со Унијата“, рече Османи.
Тој притоа посочи дека земјава, покрај Европскиот механизам за цивилна заштита, е директно вклучена и во останатите заеднички политики на ЕУ за справување со предизвикот на пандемијата, како што се заедничката јавна набавка на медицински средства и материјали, размената на информации и стекнати знаења, исклучувањето од извозните ограничувања за медицински материјали и заштитна опрема и вклучувањето во Европскиот солидарен фонд.