Основното јавно обвинителство – Скопје денеска соопшти дека презема дејствија за расветлување на причините за смртта на Коста Крпач. Според нив, Специјалното јавно обвинителство од кео беше побарно да достави информации, не доставило ниту еден доказ или било каква релевантна информација во врска со случајот.
„Неопходно е да истакнеме дека од Јавното обвинителство за гонење на кривични дела поврзани и кои произлегуваат од незаконското следење на комуникациите не е доставен ниту еден доказ ниту пак било каква релевантна информација во таа насока, но и покрај тоа Основното јавно обвинителство – Скопје продолжува да го истражува случајот.
Издадени се голем број наредби за вршење вештачења, анализи, прибирање податоци и документација. Во тек е повикување и се извршуваат разговори со лица за кои може да се очекува дека имаат одредени податоци за расветлување на настанот. Се преземаат и други истражни дејствија кои се во тек.
Основното јавно обвинителство – Скопје ќе продолжи со преземање дејствија. Соработува и ќе соработува со сите институции во насока на откривање и гонење на сторителите на кривични дела. Веднаш штом ќе се добијат конкретни податоци за случајот, јавноста ќе биде известена.“ се вели во соопштението.
Претходно од Специјалното јавно обвинителство соопштија дека го прифатиле барањето и до ОЈО доставиле допис во кој споделиле податоци кои можат да придонесат во расчистување на околностите под кои настапила смртта на Крпач.
-Сепак, информациите и списите кои беа барани, а кои не се поврзани со испитување на околностите под кои настапила смртта на лицето Коста Крпач, не се споделени со Основното јавно обвинителство Скопје, бидејќи истите се дел од предистражна постапка пред ова Јавно обвинителство која е во тек, велат од СЈО.
Коста Крпач (40) беше пронајден починат во својата спална соба, со прострелан рана во градниот кош.
Пред да настане смртта, тој испукал три куршуми во возило паркирано пред неговата зграда, кое било во сопственост на фирма за пиротехника „Огнометика“. Комбето било празно, а според МВР од се уште неразјаснети причини Крпач рафално ги испукал куршумите кон возилото.
Коста Крпач бил сведок нa Специјалното обвинителство, а неговото име се најде и на списокот на колективната аболиција на Иванов. До денеска, претседателот одбива да соопшти зошто ова лице е помилувано, иако против него СЈо тврди дека не се водела постапка, туку тој имал својство на сведок.