Соња Поповска, вработена како Раководител на одделение за координација на подрачните единици во регионот Гевгелија, Елена Олумчева од Богданци, Државен инспектор во Државен инспекторат за земјоделство, Гордана Матева од Валандово, соработник за подготовка, прибирање и обработка на податоци од Регистрите на Министерството во П.Е Валандово, Митко Велков од Гевгелија, соработник за подготовка, прибирање и обработка на податоци од Регистрите на МЗШВ во подрачна единица Гевгелија и Владимир Столевски од Скопје, референт за административни работи во Подрачна Единица Кисела Вода на МЗВШ, се приведените лица од акцијата која МВР денеска ја спроведе за злоупотреба на државни субвенции.
Во акцијата спроведена во Скопје, Тетово, Гевгелија и Валандово, опфатени се 24 лица против кои е покрената истражна постапка за постоење на основано сомнение дека сториле кривично дело Злоупотреба на службена положба и овластување по член 353 став 5 в.в. став 1 од Кривичниот законик и се сомничат за незаконско работење со кое нанеле штета на Буџетот на Република Македонија во износ од околу 220.000 евра.
Како што има објавено порталот „Призма“, на правното лице ДЗПТУ Дедема Плус Дооел Скопје чии управител е 34-годишниот З.Д од Скопје, му биле доделени 2 решенија за субвенции во износ од 12.6 илјади евра.
Фирмата ДПТУ Агро Проџек Велјанови Дооел, чиј управител е С.В од Скопје, 48 години, исто така добила две решенија во износ од 9.3 илјади евра.
На Агро Лезет Доо, чиј управител е турскиот државјанин Х.Л.Д и биле доделени пет решенија за субвенции во износ од 50 илјади евра, додека на Агро Проџек Рамака Дооел Гевгелија, чиј управител е Р.В, 26 години, доделени и биле 2две решенија во износ од 5 илјади евра.
Ова не е прв пат осомничените да се судрат со законот. Во 2014 година, Основното јавно обвинителство поднело кривични пријави за злоупотреба на службена должност и за Велков и за Матева, како и за сите правни лица погоре споменати како дел од злоупотребата.
Основаното сомнение е дека во периодот од 2011 година до 2016 година осомничените службени лица ја искористиле својата службена положба или овластување и ги пречекориле границите на своите службени овластувања при склучување и раскинување на Договори за закуп на земјоделско земјиште.
При преземањето на незаконитите дејствија биле помогнати од останатите осомничени. Во исто време, одобрувале исплата по Програмата за финансиска подршка во земјоделството – субвенции, на кој начин прибавиле корист за повеќе правни и физички лица на штета на Буџетот на Република Македонија.