Калифа Гедбане останува меѓу стативите на двократниот европски ракометен првак, Вардар и за наредната сезона, Сташ Скубе, пак, ќе остане да ја организира играта на „црвено-црните“ до 2022 година.
Алжирскиот голман Гедбане пристигна во Скопје во 2018 година и цела сезона беше во сенка на Дејан Милосављев. Но, низ минутажата што, сепак, ја добиваше, демонстрира силен потенцијал и се очекува да дојде до полн израз по заминување на српскиот репрезентативец. Негов конкурент за голманската позиција ќе биде Летонецот Артурс Кугис кој се придружи на вардарци од тимот од Гросвалштад.
Словенечкиот репрезентативец Скубе, пак, го задржа работното место организатор на игра или среден бек до 2022 година. И тој дојде лани, пред почеток на сезоната, како наследник на Лука Циндриќ и соврешно се вклопи во целината. Ги освои трибините и стана важна алка во акциите на терен, па како награда дојде новиот тригодишен договор.
На Вардар досега му пристапија тренерот Давид Писонеро (Валјадолид), голманот Артурс Кугис (Гросвалштад), левото крило Димитар Димитриоски (Металург), левиот бек Павек Атман (Хановер) и кружниот напаѓач Сергеј Горпишин (Ерланген).
Од екипата во меѓувреме заминаа тренерот Роберто Гарсија Парондо, Дејан Милосављев (Фухсе Берлин), Игор Карачиќ (Виве Кјелце), Дмитри Кисељев (Чеховски Медведи), Глеб Калараш (Мотор Запорожје), Рожерио Мораеш (Веспрем), Јања Војводиќ (Баја Маре) и Владо Недановски.