Фудбалската асоцијација на Англија го суспендира Арсен Венгер на четири натпревари, а менаџерот на Арсенал ќе мора да плати и 25.000 фунти за вербалниот дуел со четвртиот судија за време на натпреварот со Барнли во претходното коло во Премиерлигата.
Французинот со казната ги пропушта дуелите со Саутемптон во ФА купот и со Вотфорд, со Челзи и со Хал во шампионатот. Клубот од „Емирати“ најави дека нема да поднесе жалба на ваквата одлука на англиската ФА.
Венгер во текот на неделата ги прифати критиките за неспортско однесување. Поради расправија со судијата доби црвен картон во судиското продолжение на средбата и остатокот од времето се обиде да го догледа од тунелот што води кон соблекувалните. Тогаш имаше „блиска средба“ со четвртиот судија кого го оттурна во еден момент за што сега е санкциониран.