Словенечкиот премиер Јанез Јанша беше предмет на жестоки критики во Европскиот парламент во Стразбур при презентирањето на приоритетите на неговата земја како ротирачки претседател на ЕУ.
Претседателот на групата на Европската народна партија, Манфред Вебер, истакна дека владеењето на правото никогаш не е проблем на една држава, туку на целата Унија. Тој повика на итно назначување на словенечки претставник во Европското јавно обвинителство. За истото апелира и лидерот на групата на Прогресивниот сојуз на социјалисти и демократи, Ираче Гарсија.
Најкритичен беше претставникот на „Обнова на Европа“, Малик Азмани.
„Дури и кога ги претставивте вашите приоритети пред Комисијата минатата недела, не можевте да се воздржите од вклучување политиката во ова“, рече тој, додавајќи:
„Ве молам, престанете да ги вознемирувате новинарите и судиите. Престанете да ги именувате вашите политички пријатели во полицијата и започнете да назначувате обвинители во Европското јавно обвинителство. Комисијата не би требало да го одобри распределувањето пари според вашиот план за закрепнување, пред независните словенечки обвинители да бидат испратени до Европското јавно обвинителство“.
Словенечката европратеничка од Прогресивната алијанса на социјалисти и демократи, Тања Фајон истакна дека постапките на премиерот Јанша не се постапки на целата нација и дека огромното мнозинство на Словенците не го поддржуваат патот по кој се движи земјата.