По вчерашниот инцидент во Општина Карпош, во кој се степале сопруг на вработена во општината и нејзиниот љубовник, „подебелиот крај“ го извлекол сопругот кој бил прободен со нож од швалерот на сопругата, кој, инаку, исто така бил вработен во општината, градоначалникот Стефан Богоев им дал отказни решенија на двајцата љубовници. Тие биле ангажирани со договор на дело во општина Карпош.

Во просториите на оваа општина вчера се случувала вистинска љубовна драма во која учествувале токму вработените во општинската администрација. И градоначалникот Богоев вчера го потврди немилиот настан, по што им дал и отказ на вработената  од одделението за поддршка на Советот и на нејзиниот колега.

МВР информираше дека вчера во 11,30 часот по претходна расправија С.А. (34) со остар предмет му нанел повреда на В.К. (37), двајцата од Скопје. Повредениот веднаш бил пренесен во ГОБ „8 Септември“, каде му била укажана лекарска помош.

Градоначалникот Богоев, во изјава за ,,Фокус” вчера демантирал дека учесниците во инцидентот се советници во oпштината.

– Станува збор за лица привремено вработени во општинската администрација, не се советници. Вработената е во одделение за поддршка на Советот, па можеби затоа некој помислил дека се работи за советници од општината – раскажува градоначалникот.