Пријавениот барал од новинарите да се легитимираат, а откако тие одбиле, прво физички го нападнал А.Т. удирајќи го со боксови и клоци во пределот на главата и телото, а В.Ж. бидејќи бил наведнат и ги снимал ливчињата -банкноти добил удар во задниот дел од главата, по што паднал на земја и добил уште еден удар во предел на вратот со нога, по што паднал во бесознание
Единицата за насилен криминал денеска поднела кривична пријава против М.К. (37) од Скопје, осомничен за тепањето на новинарите на електронскиот медиум „А1 ОН“, пред портата „Македонија“ на протестот на „За заедничка Македонија“ кој се одржа на 27 минатиот месец, соопштија од МВР.
„Во моментот кога од пред Собранието на Република Македонија, оштетените тргнале кон нивната редакција која се наоѓа во близина на плоштад „Македонија“, пред „Порта Македонија“ забележале повеќе лица како од „Порта Македонија“ фрлаат ливчиња кои биле во форма на банкноти и на истите имало текст на македонски и албански јазик, по што одлучиле да го документираат настанот. Во моментот кога почнале да снимаат им пришол М.К. со уште едно непознато машко лице и од нив побарале да се легитимираат, на што оштетените одбиле притоа кажувајќи им дека немаат потреба да им се легитимираат ним бидејќи тие не се службени лица. Незадоволен од реакцијата на новинарите пријавениот прво физички го нападнал А.Т. удирајќи го со боксови и клоци во пределот на главата и телото, а В.Ж. бидејќи бил наведнат и ги снимал ливчињата -банкноти добил удар во задниот дел од главата, по што паднал на земја и добил уште еден удар во предел на вратот со нога, по што паднал во бесознание. А.Т. во тој момент повикал помош и во истиот момент пришле униформирани полициски службеници кои веднаш почнале да го бркаат пријавениот и другото непознато лице, кои избегале кон ГТЦ“, пишува во соопштението на МВР.
Како што велат од МВР, осомничениот М.К. е познат сторител на имотни деликти и нарушител на јавниот ред и мир.