Ни по вчерашната координација на парламентарните групи со претседателот на Собранието, Талат Џафери за тоа, нема конкретен одговор кога ќе се одржи собраниската седница за разгледувањето на 35 илјади амандмани поднесени од ВМРО ДПМНЕ на Законот за употреба на јазиците.

Неофицијално, единствена причина што оваа седница не се закажува е отсуството на многу пратеници од мнозинството.

Засега никој не попушта од своите позиции, власта ќе проба да ги искористи деловничките одредби кои предвидуваат да се отфрлат дел од амандманите, а ВМРО-ДПМНЕ смета дека власта сака насилно да го донесе законот со кршење на собранискиот Деловник.

Ниту еден од координаторите не кажува можен датум кога би се одржала расправата.

И од власта и од опозицијата велат дека само со политички договор може да се деблокира седницата за Законот за употреба на јазиците.

Според нив, од Џафери и неговото толкувањето на Деловникот зависи моделот како ќе се води раправата. Моделот кој најмногу „држи“ е тој на спојување на амандманите по членови, односно заедничка дискусија за сличните амандмани.

Предлог- законот за употреба на јазиците, при првото и второто читање не претрпе никакви промени, а во  додека во амандманската фаза и покрај ограничената расправа во матичната Комисија, пратениците од ВМРО-ДПМНЕ кои тогаш предложија над 80 амандмани, не учествуваа во нивната елаборација, поради бојкотот на работата на Собранието.

Законот за јазиците беше усвоен на 11 јануари со 69 гласови за, ниту еден против и само еден воздржан при гласањето со Бадентерово мнозинство.

Но, на 17 јануари, Иванов оцени дека законот го загрозува унитарниот карактер на државата и се коси со Уставот, па не го потпиша указот.

На 28 јануари, ВМРО-ДПМНЕ предложи над 35 илјади амандмани за констатациите на Иванов.

По ова, на Собранието му беа потребни повеќе од две недели за преведување и техничко прилагодување на амандманите.

Не се исклучува можноста судбината на законот да биде дел од агендата на работните групи меѓу СДСМ и ВМРО-ДПМНЕ каде се разговара за национален консензус за реформските закони.

На координација било договорено да се одржи седница за пратенички прашања на 22 февруари, четврток.

За денеска се закажани две седници, на едната на дневен ред се само измените на Законот за пензиско и инвалидско осигурување по скратена постапка, а на втората се 21 точки, меѓу кои се и изборот на потпретседатели на Собранието и дел од реформските закони, измените на законите за судови, за укажувачи и за Народниот правобранител во второ читање. Наредната собраниска седница е закажана за 5 март, на која што на дневен ред се 53 точки.

Ако владејачката коалиција успее да собере кворум, бидејќи неколку пратеници се на службено патување, една пратеничка е повредена и друга на породилно отсуство, денеска може да бидат избрани и потпретседателите на Собранието, за што се предложени Фросина Ременски (СДСМ), Горан Мисовски (НСДП), и Весел Мемеди (НДП).