На денешното продолжение на протестите во рамките на Шарената револуција, главна атракција беа куклите со ликовите на поранешниот премиер Никола Груевски, на поранешниот првчовек на тајната полиција, Сашо Мијалков, на минстрите Миле Јанакиески и Гордана Јанкулоска, како и на шефот на Кабинетот на Груевски, Мартин Протогер. Сите кукли беа во затворска униформа а истите “го предводеа“ денешниот марш до Собранието.
Како и вообичаено граѓаните кои ги поддржуваат протестите се собраа пред седиштето на Специјалното јавно обвинителство во 18 часот, и покрај врнежливото време. Маршот се одвиваше под паролата „Нема да ви помине“, како порака за изгласната селективна аболиција од пратениците на ВМРО-ДПМНЕ и ДУИ како и враќањето на министрите Митко Чавков и Диме Спасов.
На пат кон Собранието, повторно беше обоено седиштето на Министерството за правда каде “војниците“ на Шарените испишаа „Шарам правда барам“. Поради временските услови денеска не беа предвидени говори пред Собранието, каде што и нешто порано заврши протестот од вообичаеното, но кулминација на протестот беше откривањето на импровизираните пердиња врз Порта Македонија и повторно шарање на објектот кој најмногу претрпи боја до сега.
„Ова ќе биде Триумфална порта“, е пораката испишана на Порта Македонија.
Додека траеше настанот пред Собранието, постојано се пуштаа “бомби“ кои ги објавуваше лидерот на опозицијата Зоран Заев а во кој владини функционери зборуваат за малтретирања со инспекции во одредени градови.
Протестот се одвива
ше мирно, a повеќе за тоа во ВИДЕО-ХРОНОЛОГИЈАТА.
Инаку движењето Протестирам денеска напиша дека по една година “оваа криза со преговори не се решава, затоа што со криминалци не се преговара, туку исклучиво на улица!“
– Од оваа борба нема откажување! Нашиот избор е тоталитарно мракобесие или улица. Ние ја одбираме улицата и затоа ви порачуваме: раскомотете се, ова ќе биде пеколно лето!#Протестирам полека ќе станува #блокирам, #окупирам и секојдневно го #менувам системот!”, вели Протестирам и додава дека ги повикува сите граѓани, “особено до оние кои сѐ уште не се вклучиле во протестите, да се вклучат – тоа да го сторат на начин на кој што знаат и умеат и да ја врамат пораката како што тие мислат дека треба! Никој нема монопол на оваа борба, таа е на сите, насекаде и на долг рок!”