Французите немаа поим дека младешкиот изглед на нивниот претседател, Емануел Макрон, ќе ги чини толку многу пари. Имено, магазинот Ле Поинт откри дека тој само за три месеци откако влезе во Елисејската палата, потрошил 26.000 евра за одржување на неговиот убав тен, свеж изглед и уредна фризура. Толку е платено од државниот буџет за мејк ап на стилистот кој се грижи за изгледот на Макрон.
Елисејската палата потврдила дека најмладиот француски претседател поради тоа да изгледа поубаво на прес конференции и патувања, секога морал до себе да има козметичар, а тоа француските граѓани ги чини речиси 6.500 евра месечно.
Интересно е дека Макрон посебно се средувал за средбите со политичарите како Доналд Трамп, рускиот претседател Владимир Путин или германската канцеларка Ангела Меркел, кои се неколку децении постари од него.
Оланд и Саркози трошеле повеќе од Макрон
Затоа логично е да се постави прашањето, зошто младешкиот изглед на претседателот, кој по природа на работите изгледа далеку подобро од повеќето светски лидери, потрошил толку многу на разубавување. Еден од неговите соработници изјавил дека трошоците за козметички третмани на некои може да им изгледаат многу големи, но всушност тие се многу помали од неговите претходници.
Така на пример, поранешниот социјалистички француски претседател, Франсоа Оланд, кому многумина му се смееја бидејќи во Елисејската палата вовел „шампонски социјализам“ им плаќал на козметичарите и фризерите по 9.895 евра месечно. Дел од јавноста сепак донекаде имаше разбирање за трошоците за разубавување на некогашниот претседател Николас Саркози.
Неговата сопруга, Карла Бруни, беше далеку помлада, а покрај тоа и уште преубава глумица и пејачка, па не беше чудно што трошеше по 8.000 евра месечно на одржување на одржување на својата виталност и привлечност. Но, од Елисејската палата веднаш беше сооптено дека козметичките сметки на претседателот во иднина ќе бидат значително намалени.
Макрон ги повикува Французите на радикално штедење
За споредба, поранешниот британски премиер Тони Блер, за шест години од својот мандат потрошил 1.800 фунти пари од буџетот на своите фризери и козметичари. Откако е објавено дека Макрон потрошил мало богатство на шминка и разубавување, сите со нетрпение чекаат како француската јавност ќе реагира кога нивниот претседател ќе ги повика на радикално штедење и ќе претстави радикални и сеопфатни промени во француските закони за работни односи. Опозицијата и синдикатите веќе најавија дека нема да седат со скрстени раце и да гледаат како се намалуваат права и платите на работниците, и дека никакво штедење не може да биде оправдано за укинување на речиси светиот француски работнички кодекс.
Популарноста радикално му се намали
Освен тоа, владата на Макрон најави уште многу други непопуларни мерки на штедење за да го намали државниот долг кој изнесува 9 милијарди евра. Ќе биде исто така интересно да се види како на тоа ќе реагираат студентите и семејствата со ниски приходи откако владата ќе им ги укине субвенциите за станарини.
Поради тоа, но и поради намерата својата сопруга службено да ја прогласи за Прва дама на Франција, што јавноста со индигнација го одби, популарноста на Макрон драматично падна. Додека во април имаше поддршка од 57 отсто од граѓаните, сега неговата политика ја поддржуваат се на се 37 проценти од гласачите и поради тоа на почетокот на мандатот стана еден од најнепопуларните претседатели.