Добитникот на Нобеловата награда за литература, турскиот писател Орхан Памук цврсто го критикуваше апсењето на влијателниот новинар и писател Ахмед Алтан во напис објавен во италијанскиот весник Република.
– Многу сум лут, изразувам најостра критика против апсењето на Ахмед Алтан, едно од видните пера на турското новинарство, и на неговиот брат Мехмед Алтан – истакнат економист, пишува Памук.
Критикувајќи ја власта на Ердоган, Памук дополнува дека во Турција, на основата на најсвирепата омраза, постепено во ќелии ги затвораат сите луѓе кои си дозволуваат да упатуваат и најмали критики против активностите на владата.
– На пат сме да преминеме од правна држава кон режим на терор, вели тој, и инсистира сите уапсени интелектуалци да бидат пуштени што е можно побрзо за да можат да се појават слободни, ако треба да се судат.
Ова е прва реакција на Памук по чистката која ја спроведува претседателот Реџеп Таип Ердоган по неуспешниот обид за државен удар во јули годинава.