Поранешниот претседател на Кривичниот суд, Владимир Панчевски , обвинува дека при претресот во неговиот дом, истражител од Специјалното јавно обвинителство му го украл клучот. Тој ова тврдење го темели врз основа на снимка од надзорна камера во неговиот дом, која ја споделил во медиумите.
Судијата Панчевски тврди дека ова видео е најфрапантниот доказ за начинот на кој работи СЈО и притисоците што ги врши врз него но и за притисоците што треба да ги очекуваат и неговите колеги.
Според него снимката служи како доказ за криминалот и подметнувањата со кои се служи СЈО.
„Не говорам за вербални закани и физичко насилство, туку за најподмолна конструкција и криминал од времето на УДБА“, вели Панчевски.
Претресот во домот на Панчевски е поврзан со предистражната постапка што ја води СЈО за бизнисменот Љупчо Палевски, а налогот за претрес во неговиот дом во Скопје доаѓа од гевгелискиот суд. Според него, наредбата за претрес е за кривичните дела незаконско прислушување и уцена и го спори тоа што е издадена од гевгелискиот суд.
Од СЈО објаснуваат дека водат предистржана постапка за три кривични дела.
Истражители и обвинители од тимот на Катица Јанева со полициска асистенција, завчера извршија претрес во канцелариите и домовите на тројца осомничени, меѓу кои и поранешниот претседател на судот Владимир Панчевски.
Јанева изјави дека не може да потврди, дали поранешниот претседател на Кривичниот суд, Владимир Панчевски, тајните податоци од судот му ги давал на претседателот на државата, Ѓорѓе Иванов и додава дека тоа што го барале, било најдено во канцелариите и домовите и било одземено.
„Тоа на кого му биле предавани тајните податоци, не можам да потврдам. Откако ќе бидат анализирани податоците, во интерес на нашите постапки, ќе бидете известени. Тоа не можам да го потврдам, тоа се само шпекулации и претпоставки“, изјави специјалната јавна обвинителка Катица Јанева.