Македонија одигра еден од оние мечеви со сублимат „резултат за паметење, игра за заборав“. Совладана е Ерменија во Скопје со 2:0 во второто коло од четвртата група во Д Лигата на нации на УЕФА за осамнување на лидерската позиција на табелата. Езџан Алиоски во 14. минута од пенал и Горан Пандев во 59. минута беа стрелци за новата, втора, победа без примен гол на „црвено-жолтите“ во пионерскиот проект на УЕФА што тргна пред неколку дена, а води до Европското првенство во 2020 година.
„Одиме меч по меч и ќе се излажеме ако помислиме дека работата е завршена. Пред нас се уште четири натпревари. Ништо не е готово засега. Ќе биде готово по реваншот со Гибралтар“, изјави селекторот Игор Ангеловски по мечот за елиминирање на секаква можност за некаква еуфорија што би можела да биде контрапродуктивна во преостанатите 360 минути од групната фаза.
За него е најважно што договорот како да се одигра се преточи на дело во форма на триумф и три бода. Оттука и изразеното задоволство по првата од двете дерби средби во конкуренцијата четири што значи продолжување на низата без пораз на девет натпревари или само еден (од Шпанија) во последните 12 изданија. Задржан е позитивниот амбиент во тимот, зголемена е самодовербата и упатена е покана до гледачите да присуствуваат во поголем број на трибините во предизвиците што следуваат.
„Натпреварувањето носи голем влог за ние да не играме на резултат. Победивме со 2:0 и тоа беше најважно вечерва што беше случај и во мечот со Гибралтар. Момците го испочитуваа договореното и го испорачаа одработеното на подготовките“, дополни Ангеловски.
Дека резултатот против Ерменците бил пред играта се согласи и Горан Пандев. Капитенот го изнуди пеналот во првото полувреме што во водство го претвори Алиоски, фудбалерот на Лидс јунајтед, а во второто и сам се впиша во листата на стрелци по асистенцијата на Александар Трајковски.
„Најважно е што освоивме три бода. Многупати досега сме одиграле добро, а на крај сме останувале со празни раце. Време беше да почнеме да победуваме и со игра што не е допадлива. Таа се заборава, резултатот се памети“, нагласи Пандев.
Лигата на нации продолжува во средината на наредниот месец два нови меча за фудбалската репрезентација на Македонија. На 13 октомври (20.45 ч.) на арената „Филип Втори“ ќе гостува Лихтенштајн, три дена подоцна (16 октомври, 18 ч.) е закажан реваншот со вечерашниот ривал во Ереван.
Лига на нации, 2 коло
Лига А
Група 1: Франција – Холандија 2:1
Лига Б
Група 1: Украина – Словачка 1:0
Група 4: Данска – Велс 2:0
Лига Ц
Група 3: Бугарија – Норвешка 1:0, Кипар – Словенија 2:1
Лига Д
Група 1: Грузија – Летонија 1:0
Група 4: Македонија – Ерменија 2:0, Лихтенштајн – Гибралтар 2:0