Дури 680.000 луѓе во Франција возат без дозвола, а причина во повеќето случаи е цената за полагање на возачки испит, пишува весникот „Паризиен“. Во текстот се нагласува дека таквиот тренд е двојно зголемен во последните десет години и покрај ригорозните казни што се пропишани со закон.
Според официјални податоци на надлежните органи, оние кои возат без дозвола сочинуваат 1,4 отсто од сите возачи, но 4,5 проценти од нив се вклучени во сообраќајни несреќи со смртни последици. Околу две третини од возачите без дозвола се оние кои не полагале испит бидејќи наведуваат дека не можат да издвојат пари. Просечната цена за возачки испит во земјата е 1.500 евра.
Една третина од жителите без возачка дозвола се оние на кои им е одземена поради направен прекршок.
Доколку возачот во текот на рутинска контрола биде фатен без дозвола, паричната казна изнесува до 15.000 евра, а возилото може да биде одземено на самото место доколку возачот не е сопственик. Доколку возачот без дозвола изврши прекршок, казната може да биде уште поголема, до две години затвор или 30.000 евра.