Регионалниот парламент на Каталонија доцна синоќа усвои закон кој предвидува организирање референдум за самоопределување на оваа покраина во Шпанија, со што се отвора можност за повторна криза со централните власти во Мадрид.
Нацрт законот во кој се наведува дека каталонскиот народ е „суверен народ“, усвоен е со 72 гласа за и 11 воздржани. Пратениците на опозицијата ја напуштија салата пред гласањето.
Каталонските пратеници сакаат по пат на закон официјално да закажат референдум за независност од Шпанија на 1 октомври, по повеќегодишно спротивставување на централните власти, кои таквото гласање го сметаат нелегално.
Шпанската конзервативна влада соопшти дека пред гласањето се обратила до Уставниот суд.
-Владата побара од Уставниот суд да го прогласи за неважечко гласањето во Парламентот, исјази потпретседателката на Владата Сораја де Сантамарија, која овој потег на каталонскиот парламент го оцени како обид за наметнување одлука на сила, „достоен на диктаторски режим“.
На чело на каталонската влада од почетокот на 2016 е сепаратистичка коалиција која вети дека областа ќе ја доведе до независност. За независност во 2014 се изјаснија 1,8 милиони каталонци на необврзувачкото гласање, исто така одржано на противење на властите во Мадрид, кои сецесионистичките иницијативи на Каталонија ги сметаат за противуставни.
Каталонија е една од 17 автономи покраини на Шпанија. Официјално, како „историска нација“ се признати во Каталонскиот автономен статут од 1979 година, во согласност со Уставот на Шпанија од 1978 година.