Со широко мнозинство и поддршка од три партии, Екатерини Сакеларопулу е избрана за прв жена претседател на Грција. На специјалната седница во грчкиот Парламент гласаа 294 од 300 пратеници од кои 261 беа „за“ предлогот на владата за нов претседател на државата. Новата претседателка на Грција ќе положи свечена заклетва на 13 март по што и официјално ќе ја преземе функцијата.
Пратениците гласаа со прозивање и имаа избор или да го кажат името на Сакеларопулу што значи глас „за“ или да кажат „присутен“ што е еднакво на глас „против“. Позитивно се изјаснија пратениците од „Нова демократија“, од СИРИЗА и „Движењето на промена“, а „присутни“ гласаа 33 пратеници од „МЕРА25“, Комунистичката партија на Грција и „Грчко решение“.
Отсутни од гласањето беа шестмина пратеници. Меѓу нив и поранешниот грчки премиер од Нова демократија, Андонис Самарас, кој е во САД, пратеникот Трифонас Алексиадис од СИРИЗА кој има здравствени проблеми, како и двајца пратеници на кои на пат кон Парламентот им се расипале автомобилите и не стигнаа на време за гласањето. Соопштувањето на резултатите од Претседатеот на Парламентот беше проследено со аплауз од присутните пратеници.
„Согласно соопштените резултати се констатира дека според член 32 параграф 3 од Уставот, за претседател на државата се избира госпоѓа Екатерини Сакеларопулу. Нејзината кандидатура, не само што собра, туку и го надмина зголеменото двотретинското мнозинство на вкупниот број на пратеници. Дами и господа колеги, барам одобрение од Парламентот, во име на Парламентот да се посети избраната претседателка на државата за да ѝ се соопштат резултатите од гласањето и нејзиниот избор. Парламентот одобри“, рече претседателот на Парламентот, Константинос Тасулас, соопштувајќи ги резултатите од гласањето.
Во 13.30 часот по локално време, Тасулас ќе го посети Советот на државата, највисокото судско тело во Грција, каде што Сакеларопулу е претседателка за ѝ формално да и соопшти дека е избрана за претседател на Грција.