Првите извештаи за трошоците за предизборна кампања стигнаа до ДИК, Државниот ревизор и Антикорупциската комисија.
Првите десет дена од кампањата, на посебната банкарска сметка за избори на партијата на власт, СДСМ, легнале речиси 40.000 евра од донации и околу 211.000 од членарина. СДСМ од оваа сметка до сега потрошила 42.000 евра.
На посебната сметка на опозициската ВМРО- ДПМНЕ,пак, во овој период не легнале средства. Сепак, партијата во извештајот за досегашните трошоци за кампања навела дека потрошила нешто над 1.300 евра, пари од претходна членарина.
И партиите од албанскиот блок трошеле повеќе отколку што добивале.
БЕСА и двете владеачки – ДУИ и Алијанса за Албанците, според финансиските извештаи кои ги приложиле, бележат негативно салдо.
ДУИ потрошила над 143.000 евра, иако на изборната сметка досега и легнале околу 65.000 евра од членарина. Сличен е случајот и со Алијансата. На нивната сметка легнале околу 32.500 евра, а десетдневната кампања ги чинела 36.500 евра.
Опозициската БЕСА, на својата сметка инкасирала вкупно 19.000 евра од донации и членарина, а потрошила 19.500 евра.
Левица со најскромни приходи и расходи на сметката. Во првите две недели од кампањата, партијата за изборно рекламирање добила речиси 2.000 евра, а потрошила околу 1.300 евра.
Вкупно 18 политички партии и независни кандидати поднеле отчет за потрошените пари. Партиите, во извештаите навеле дека главно се финансираат од донации од членовите на раководствата и нивните семејства, како и од приходи што ги поседува самата партија. Партиите ги очекува уште еден финансиски отчет за следните десет дена. Освен тоа, 30 дена по затворањето на сметката тие ќе треба да поднесат и финален извештај кој се должни да го објават на своите веб страници.
За споредба, минатиот изборен циклус, партиите во првите десет дена добиле многу повеќе донации, но и трошеле повеќе.
СДСМ собрала најмногу пари од донации, според првиот финансиски извештај за изборна кампања во 2016. На партиска сметка тогаш се слеале 155.788 евра по основ на донации и уште 379.539 евра од членарина или вкупно 535.327 евра. Тогаш опозициската СДСМ потрошила 155.700 евра.
Коалицијата предводена од ВМРО ДПМНЕ во 2016, за десет дена изборна кампања потрошила шест пати повеќе пари отколку што сбрала преку донации. На нивната сметка легнале 120.838 евра, а потрошиле 714.819 евра.
За парламентарните избори во 2016, во првите десет дена ДУИ потрошила скоро 87.000 евра, додека на партиската сметка по основ на донации се собрани 111.882 евра.
Според пријавените финансии во тој период, ДПА преку донации обезбедлила речиси 10.000 евра, а потрошила близу 7.000 евра.
За претходните избори, во периодот од 21 до 27 ноември, според податоците од првичните извештаи, Транспернси интернешнал констатираше декаполитичките партии само за митинзи потрошиле 300.000 евра и уште толку за медиумско рекламирање.