НОВА ТВ направи хронологија за дејствувањето на полициските сили во текот на вчерашниот ден. Хронологијата е направена врз основа на официјални и неофицијални информации и сведоштва од полициски службеници кои биле активирани во дејствијата во Собранието.
До 18 часот на редовна задача околу Парламентот имало еден вод на ЕБР од 30-тина луѓе и 50-тина униформирани полицајци. Обезбедувањето било во бројка како и секој ден во изминатите два месеца откако почнаа протестите на „Иницијативата за заедничка Македонија“.
Првиот повик за засилување до Оперативниот штаб во МВР пристигнал нешто по 18 часот, веднаш по обидот за влегувањето на демонстрантите во Парламентот. Главен на Оперативниот штаб е министерот Агим Нухиу, но со него командува директорот на Бирото за јавна безбедност, Митко Чавков.
Старешината на водот бара помош и засилување и јавува дека има обиди за влегување во Собранието. Цели два часа Чавков не испраќа засилување. Внатре во Парламентот се истепани пратеници, има нападнати новинари, демонстранти го демолираат инвентарот, ја зазедоа собраниската сала за седници, но директорот на БЈБ не реагира.
Дури по два часа, во 20 часот специјалците од „Тигри“ и ЕБР добиваат наредна од Оперативниот штаб да излезат на терен.
Тогаш почнува акцијата за истиснување на топлата пред Собрание, за исфрлање на демонстрантите од зградата и евакуација на пратениците. Беа потребни само неколку шок бомби за да се растера масата народ, но тоа се случи дури откако специјалците излегоа на терен.
Симптоматично е, велат нашите извори во МВР, како лицата со маски и качулки точно знаеле каде се наоѓа прес центарот во кој прес конференција држеше лидерот на СДСМ, Зоран Заев, и останатите пратеници од мнозинството во Парламентот. Зградата на Собранието е огромна, а тие се упатија веднаш на вториот кат, на точната локација.
„Тоа значи дека некој ги насочувал каде да се движат“, велат изворите на НОВА ТВ.
Дел од насилниците се идентификувани и се работи за лица со дебели полициски криминални досиеја, познати рекетари блиски до партијата ВМРО-ДПМНЕ.
Во МВР очекуваат дека сега ќе има внатрешни истраги за да се испита командната одговорност на Чавков, но и за улогата на други полицајци кои на влезот ги пропуштаа демонстрантите да влегуваат.
Инаку, Митко Чавков како директор на БЈБ го назначува и разрешува Владата. Министерот има надлежност да смени и именува началници.