Резултатите на последните три лица (едно вчера и две завчера) кои беа тестирани за коронавирус се негативни. Властите, сепак, апелираат до граѓаните да се придржуваат до препораките доколку патувале во региони каде се регистрирани случаи на болеста, како и да се почитува одлуката за откажување на јавни собири.
Министерот за здравство Венко Филипче вчера информира дека тестот на возачот, кој го управувал комбето со пациентката кај која подоцна беше дијагностициран коронавирусот, е негативен, но тој ќе остане во изолација во домашни услови до 14-от ден кога завршува инкубацијата по што лекарите ќе одлучат дали лицето повторно ќе биде тестирано.
Негативен е тестот и кај лицето кое се јавило преку виничкиот Здравствен дом и се тестирало на штипското Инфективно одделение. Жената, пак, која вчера се јавила со симптоми на коронавирусот, била во регионот на Северна Италија и пристигнала во земјава на 26-ти овој месец без симптоми, со индивидуален превоз со уште еден член од семејството. Вчера утрото со симптоми се пријавила на Инфективната клиника.
Во карантин сè уште се четирите лица и оние девет кои патуваа со пациентката позитивна на коронавирусот која е на Инфективната клиника. Таа е во добра општа состојба, нема температура и веќе влегува во фаза на оздравување.
Според информациите со кои располага нашиот Конзулат во Италија, меѓу македонските граѓани кои живеат во северните италијански регион нема заболени од коронавирусот и некој е во карантин. Сепак, не се знае точниот број на оние кои доаѓаат од овој регион во земјава.