Ник Кирјос имаше несекојдневен пех за време на Божик. Наместо во домашна атмосфера, со најблиските, австралискиот тенисер го мина празникот во болница во Канбера поради каснување од пајак.
„Ме касна пајак за левото стопало. Секој Божик е поинаков од претходниот“, напиша Кирјос на социјалните мрежи во период додека се подготвува за одбрана на титулата во Бризбејн, еден од турнирите што традиционално служат за темпирање на формата за Австралија опен.
Меѓу колегите што се огласија со коментар под неговиот пост беше и Британецот Енди Мареј.
„Уште полуд си, откако те гризна пајакот“, му возврати поранешниот број еден на АТП ранг листата.
Очекувањата се, сепак, дека Кирјос ќе биде во можност да настапи на отворање на новата сезона. Учество на премиерниот турнир во 2019 година го потврдија и Мареј и Рафаел Надал. Во тој контекст и новото огласување на Австралиецот дека се упатил кон Бризбејн што упатува на заклучок дека е добро и ќе биде во можност за настап.
Кирјос предвреме ја заврши 2018 година по повредата на лакото за време на „Кремлин Куп“ во Москва.