На денешната седница на Советот за безбедност кај претседателот Стево Пендаровски, донесена е одлука за прогласување на нова вонредна состојба што ќе трае во следните 30 дена. Формално-правно, тоа нема да биде продолжување на состојбата која завршува денеска бидејќи во моментот нема таква можност затоа што Собранието не работи. Пендаровски, посочи дека уставотворецот нема предвидено ситуација во која Собранието не работи и не ја потврдува првата одлука за вонредна состојба, а кога има потреба од продолжување на истата. Тој вели дека ја презема одговорноста да донесе одлука за утврдување на постоење на вонредна ситуација во период од 30 дена.
„Вчера добив предлог за воведување на вонредна состојба во следните 30 дена. Согласно процените, jасно е дека е потребно повторно прогласување на вонредна состојба. Уставотворецот нема предвидено ваква ситуација, Собранието да не работи и да не може да ја потврди мојата прва одлука за вонредната состојба. Во ситуација кога пратениците земаат плата, кога ниту од нив нема побарано апанажа по завршување на мандатот, значи дека тие се сеуште со валиден мандат, а Собранието сепак не работи, јас ја преземам одговорноста за ваква одлука затоа што имаме ситуација без преседан, кога е далеку поважно да ги сочуваме животите и здравјето на луѓето, отколку да се криеме зад правни толкувања“, посочи Пендаровски.
Тој ги повика политичките чинители во државата да се изјаснат за начинот на продолжувањето на вонредната состојба во државата во следниот период, бидејќи со ваква ситуација сите ќе се соочат и на средината на мај.
„Постојната вонредна состојба, завршува денеска поради истекот на рокот од 30 дена за кој беше утврдена и нема да биде формално-правно продолжена, бидејќи нема уставен основ. Затоа денеска, врз основа на нов образложен предлог од Владата, а во ситуација кога Собранието не работи, ќе донесам нова одлука за утврдување на постоење на вонредна ситуација во период од 30 дена на територијата на целата територија на државата. Но ова решение, не ја намалува одговорноста на сите релевантни политички фактори во државата јасно и јавно да ги кажат своите ставови по ова прашање, затоа што во средината на мај, ќе бидеме повторно во иста ситуација“, посочи Пендаровски, кој смета дека во оваа ситуација Собранието треба да функционира.
Денешната седница на Советот за безбедност беше петта и посветена на заштита и справување со епидемијата на коронавирусот. Присутни беа претседателот на Собранието, Талат Џафери, вицепремиерката и министерка за одбрана, Радмила Шекеринска, министрите за внатрешни и за надворешни работи, Наќе Чулев и Никола Димитров и професорите Ветон Љатифи и Ненад Марковиќ. Останатите членови, како и министрите Венко Филипче и Бујар Османи кои беа поканети, поради новонастанатата ситуација поврзана со градоначалникот на Куманово, не присуствуваа.