Македонскиот претседател Стево Пендаровски денеска во Нови Сад, во рамки на дводневната официјална посета на Србија, се сретна со неговиот словенечки колега Борут Пахор за време на 4. Регионален младински форум.
На средбата беше оценето дека двете земји имаат одлични односи што се карактеризираат со пријателство и меѓусебно разбирање, а беа разменети и мислења за можностите за понатамошно унапредување и збогатување на соработката во повеќе области од взаемен интерес.
„За Северна Македонија не постои друга алтернатива, освен европската интеграција“, посочи претседателот Пендаровски.
Тој се заблагодари за отворената и конструктивна поддршка од Словенија за аспирациите на нашата земја за членство во ЕУ и во НАТО, што беше потврдена со ратификацијата на Протоколот за членство на Северна Македонија во НАТО, како и постојаната поддршка во рамките на Европската Унија.
„Потребно е менување на менталниот склоп во регионот. Наместо да чекаме пораки од Брисел и големите центри, да ја донесеме ЕУ во регионот со реформи и економски развој, за младите да останат дома“, додаде Пендаровски на панел дискусијата и упати порака „на младите да им се овозможи првата шанса за работа да ја добијат дома за што е и реализацијата на иницијативата за т.н. Мал Шенген.“
Српскиот претседател ги посочи бројките на иселување на младите во целиот регион кои се алармантни.
„За да ги задржиме младите треба да се понуди перспектива, со добра политика и раст на економијата со високи плати“, изјави Вучиќ, кој исто така посочи дека во таа насока е и иницијативата „Мал Шенген“.
Тој првпат најави и воведување на „трајни дозволи за работа“ во земјите членки на иницијатива Мал Шенген.