Министерот за локална самоуправа Ристо Пенов, кој е и поранешен градоначалник на Скопје, вели дека скопјани трпат преголема штета поради блокадите на приватните превозници. Протестот, според него, треба да биде насочен кон други, а не граѓаните да ги плаќаат последиците.
„Не можам да кажам кои мерки ќе ги преземеме, но ја следиме таа ситуација, непријатна е. Преголема штета трпат граѓаните заради, можам да кажам, некакво самоволие кое е присутно на улиците во Скопје. Ние, одејќи накај Струмица, едвај излеговме од Скопје. Непотребно. Тој протест треба да биде насочен кон тие што го креираат или тие што мислат дека им го креираат проблемот. Вака, штетата ја плаќаат граѓаните, секој по половина час најмалку во денот вози повеќе, троши гориво, се губат работни часови, бизниси, што е огромна штета за граѓаните“, изјави Пенов денеска од Струмица.
Во Скопје денеска втор ден приватните превозници поради неплатен дол кон нив од страна на Јавното сообраќајно претпријатие, ги блокираат клучните раскрсници. Градоначалничката Арсовска минатата недела порача дека тоа се долгови направени од претходните градоначалници и им порача да протестираат пред штабовите на СДСМ и ВМРО-ДПМНЕ. Градот Скопје ги раскина договорите за превоз со приватните автобуски превозници организирани во „Слобода превоз“ и „Макекспрес“ поради, како што тврди, прекршување на одредбите од договорот.