Над половина милион евра биле злоупотребени во општина Петровец, откри вицепремиерот за борба против корупцијата, Љупчо Николовски. Тој кажа дека во месец мај од страна на анонимен подносител добил претставка за злоупотреба на службена положба за перење пари во општина Петровец, а на случајот работеле и биле известени неколку институции.
Управата за финансова полиција вчера поднела кривична пријава за пет лица за злоупотреба од над половина милион евра.
-Борбата против корупцијата бара активност на сите институции, но и со максимална ангажираност на секој граѓанин. Континуирано работам на меѓуинституционална координација на сите антикорупциски органи, рече Николовски, кој додаде дека ова е само една од многуте претставки кои се адресираат до него.
-Ова е Влада која ја стави борбата против корупцијата на највисоко ниво, а вклучително беше формирана и позиција вицепремиер за борба против корупцијата, што беше поздравено и од Брисел, кажа вицепремиерот.
Од друга страна, директорот на Управата финансова полиција, Арафат Муареми извести дека кривичните пријави биле поднесени за пет физички лица и три правни лица, меѓу кои и ‘Аце-транс’. -Првопријавениот од општината издал 24 фиктивни фактури до ‘Аце транс’ и ‘Леона транс’ за наводен транспорт на шут, иако пријавените знаеле дека не биле извршени работите наведени во фактурите, истакна Муареми. Парите, додаде директорот, биле искористени за купување возила и градежна механизација за потребите на правните лица.