Терминот „Шарената револуција“ стана вирален и масовно споделуван, откако доцна во ноќта во вторникот објавив репортажа од протестите за Дојче Веле насловен „Осми ден од „шарената македонска револуција“.
Една од девојките со која разговарав на протестот, која се викаше Марија, ја запрашав за боите кои станаа заштитен знак на протестите односно дали ова се боите на македонската револуција? Таа одговори да, ова се боите на новата македонска шарена револуција. Од Фејсбук и Твитер, во средата хаштагот #ШаренаРеволуција се префрли на улиците на Скопје. Пишувам за ова не само за да се пофалам, иако навистина ми е мило ем драго за овој микроскопски удел во борбата, туку заради пресретнување на пропагандата која веќе шири параноја како странците спремале украински сценарија и обоени револуции во земјава.
Не, инспирацијата за шарената револуција дојде токму од овде, од улиците на Скопје, од нашите храбри граѓанки и граѓани кои решија да го кренат својот глас за правдата, слободата и еднаквоста! Оние сиви, тажни, безнадежни бетонски чудовишта кои го гушеа Скопје, конечно добија некаква смисла, боја, шаренило, нешто кое не обединува сите, нешто што е Македонија – шарена, каква што отсекогаш била.
И таа, барем според она како ја разбираат граѓаните на улиците и социјалните мрежи, не е револуција со насилство, војна, тепање или куршуми, туку е револуција на умот, која на мирен и упорен начин дава надеж и друга визија за „шарена“, а не еднолична и сива Македонија. Затоа, токму поради лагите кои ќе се обидуваат да ги шират и заканите за насилство на протестите кои веќе бесрамно ги праќаат, особено за вечерва (четврток), во продолжение пишувам за најмалку петте причини поради кои „Шарената револуција“ мора да остане мирна!
- Македонската шарена револуција е обединувачка, разновидна, шаренолика во секоја смисла. Таа ги обединува сите – десничари и левичари, студенти и пензионери, анархисти и институционалисти, СДСМ-овци и ВМРО-вци, Македонци и Албанци, Хрвати и Срби, Турци и Власи….Таа за прв пат, како никогаш досега ги обединува луѓето заради идеја, заради став, а не заради некакво партиско, етничко или било какво друго обележје. Таа нуди друга визија и друга иднина за Македонија, помудра, прогресивна и поинаква од онаа досега. Овие вредности се неспоиви со насилство. Насилството, заканите и омразата се типични за оние од власта со кои земјата мора да расчисти еднаш засекогаш и треба да одговараат за своите злодела, како што и бараат граѓаните, секој ден во 6!
- Можноста за провокации е висока. Инцидентот со провокаторот кој ја удри девојката пред Триумфална порта го докажува тоа. Насилство, хаос, повредени луѓе и инциденти им одговараат само на насилниците кои ги имаат окупирано институциите. Што и да се обидува некој да испровоцира, демонстрантите од движењето „Протестирам“, кои исто како и досега, би требало да одолеат на секакви провокации. На „Протестирам“ ќе најдете среќни дечиња, љубители на велосипеди, пензионери, студенти, нова убава енергија, не и насилници. Заштитен знак на ова целосно неформално движење, освен боите, се и достоинствениот начин на протест и позитивната енергија која води кон промени. Доколку се случи инцидент, тоа единствено би им било добредојдено на политичарите кои сакаат да го искористат во нивните завршни сметки и евентуално пазарање за нивен спас.
- Провладината пропаганда максимално ќе искористи било каков инцидент кој би настанал на протестите. Ќе добијат ново „месо“ за трубење на лажната приказна на сите телевизии, радија, портали и весници кои ги поседуваат, дека Заев договорен со странски служби, Америка, ЕУ, НАТО и Џорџ Сорос лично, подготвува украински сценарија за да ја уништат Македонија. Во таков случај би добиле задоволство да успеат да го оцрнат „Протестирам“ и да поентираат во нивното етикета кон демонстрантите како хулигани. Досега ова движење се покажа како мошне вешто во изолирање и игнорирање на оние кои се обидуваат да испровоцираат инциденти со полицијата.
- Меѓународната заедница. Добриот глас кој ја бие „Шарената револуција“ во светот, ќе изгуби многу доколку протестите станат насилни. Светските медиуми почнуваат да известуваат со воодушевување за новата колоритна ситуација во Македонија. Ова секако влијае директно на ставовите на политичарите во ЕУ и светот кога се работи за земјава. Или како што поентира колешката Светлана Јовановска во нејзината колумна – има само еден единствен начин на кој граѓаните можат да влијаат на преговорите кои се закажани во Виена. Тој начин е мирен масовен протест. Колку помасовен и помирен, толку повлијателен. И да бидат одложени преговорите, правилото се уште важи.
- А на кого и му е гајле на крајот на краиштата што мислат странците. Важно е што ќе направиме ние овде за себе и за земјата во која планираме да живееме. Доколку се случи ВМРО-вци и СДСМ-овци да се степаат, каква иднина ќе има оваа земја во која едвај живеат милион ипол луѓе (стотици илјади си заминаа)? Дали некој сака граѓанска војна во Македонија, за да си ја спаси кожата од правда? А која друга цел би можело да има закажувањето на контра-протест за поддршка на режимот и „прогон на соросоидите“, во исто време со протестите кои се одржуваат секој ден во шест? Секако за ова не може да мислат само одговорните граѓани кои веќе две години самоиницијативно мирно протестираат низ скопските улици на разните антивладини протести. Дали размислуваат за ова оние кои со сила за уши и со сендвичи ги влечкаат на протести? Дали тие решиле да се тепаат со своите сограѓани само затоа што имаат различни ставови? Дали размислиле зошто како последни бранители на режимот останаа осудените измамници со затворски казни кои работат во медиумите и други луѓе со сомнително минато кои прават пропаганда? Искрено верувам дека поголемиот дел од обичните поддржувачи на партиите на власт се веќе свесни колку е саат, што се вели. Титаник тоне, а сега се спасува кој стигне. Со него треба да „потонат“ и одговараат пред законите оние кои ги прегазија, а не обичниот невин народ во нивна одбрана.
И уште 1000 други причини за мир. Дополнете ги вие.