Премиерот на Бугарија Кирил Петков во интервју за бугарската телевизија Нова рече дека Бугарија треба да го помести ветото за Северна Македонија до моментот кога ќе се отвори првото поглавје од преговорите на нашата земја со ЕУ, а претходно двете земји да склучат договор кој ќе биде гарантиран од ЕУ и во кој ќе стои дека Бугарите во нашата земја ќе станат дел од Уставот.
„Мора да го поместиме ветото за почеток на преговори на Северна Македонија. Промената на Уставот треба да се случи пред првото од многуте поглавја што треба да се отворат“, рече Петков.
Тој потсети дека во 2020 година бугарската влада гласала во Советот на министри на ЕУ за Македонија да се движи по патот кон европското семејство. „Ние сме една од ретките земји што си дозволи да стави вето на евроинтеграцијата на Северна Македонија откако во 2020 дадовме зелено светло на Советот на министри на ЕУ. Долгорочната стратегија на Бугарија мора да биде Северна Македонија да биде дел од ЕУ“, изјави Петков на ТВ Нова.
Тој истакна дека за Бугарија се важни правата на Бугарите во Северна Македонија.
„Доколку во договорот се гарантираат правата на Бугарите и промената на Уставот, односно доколку промената на Уставот е дел од пакетот мерки кои ќе бидат вклучени во договорот со Северна Македонија, ова е веќе чекор напред“, рече премиерот.
Петков рече дека ветото кон Македонија треба да се помести за фазата кога ќе почнат да се отвораат поглавјата од преговорите меѓу нашата земја и ЕУ.
„Не треба да го укинеме ветото, туку само да го поместиме. Промената на Уставот треба да се случи пред првото од многуте поглавја што треба да се отворат. Пред првото поглавје, тие мора да го променат својот Устав. Треба да ги ставиме на железничките шини на Европа, но критериумите што треба да ги исполнат мора јасно да ги поставиме од нас“, нагласи Петков.
„Ние на Северна Македонија го отвораме патот до Европа, но тој пат е поплочен со барања и обврски, јасно врамени и на тој начин ја користиме цела Европа за да го обезбедиме напредокот што го сакаме како Бугари“, порача бугарскиот премиер.
„Ако сакаме сега да го променат Уставот, тоа ќе биде многу тешко. Ако им кажеме тргнете напред, го укинавме ветото, првото поглавје не може да го отворат без промена на Уставот, и тогаш веќе не треба да го менуваат Уставот затоа што сака Бугарија, туку затоа што тоа е нивниот договор со ЕУ“, посочи Петков.
Тој рече дека претседателката на Европската комисија Урсула фон дер Лајен изјавила дека ЕУ е подготвена да биде гарант на процесот. „Таа рече дека се подготвени да ја стават промената на Уставот во рамковниот договор на ЕУ со Северна Македонија пред отворањето на првото поглавје“, рече Петков и додаде дека пред да видат такво нешто, нема да го започнат процесот. (Р.Н.)