Сите досега сослушани граѓани, чии лични документи се најдени во продавница во Штип, изјавиле дека не им се земени поради поткуп, туку заради долг, напиша дополнителната заменичка министерка за внатрешни работи, Славјанка Петровска на нејзинитот Фејсбук профил како одговор на написот на министерот Наќе Чулев за наводен изборен поткуп.
„Ова не е кривично дело поврзано со изборите, туку кривично дело од областа на економскиот криминал што допрва треба да се докаже. Очајници прават очајнички потези. Срамно е да се злоупотребува позицијата министер за внатрешни работи и да се соопштуваат невистини, особено кога истрагата е во тек, што впрочем е напишано и во известувањето до ОЈО. Известувањето во кое е наведено дека не се спомнува ниту една политичка партија, а доставено е до ОЈО е потпишано и од началникот и од дополнителниот началник на СВР Штип. Со ова е очигледна намерата на Чулев да влијае на истрагата и да ја злоупотреби за партиски цели“, пишува Петровска.
Таа од нејзиниот Фејсбук профил ги повикува припадниците на МВР да не подлегнуваат на партиските притисоци и секој сомнеж за кривично дело да го докажат во соодветна постапка со соопштување на факти.