Пратеникот Кирил Пецаков официјално е кандидат за градоначалник на Охрид од редовите на опозициската ВМРО-ДПМНЕ. Ваквата информација ја објави членот на ИК на партијата, Антонио Милошоски, во дневникот на Сител телевизија, потенцирајќи дека ваквиот човек може да го врати сјајот на градот.
– Наш фаворит за општина Охрид ќе биде актуелниот пратеник Кирил Пецаков, којшто бил и советник во општината Охрид, добро познат на граѓаните, си ја извршувал совесно својата должност, познат е и помеѓу лекарите како стоматолог, познат е и меѓу спортистите како ракометар и сметаме дека тој е човек кој може да го врати сјајот на Охрид кој во овие неколку години, за жал, го изгуби, дури се најде и на црвената ризична листа на УНЕСКО, рече Милошоски.
Милошоски гледа предност кај нивниот кандидат Кирил Пецаков во однос на актуелниот градоначалник и кандидат за нов мандат од СДСМ, затоа што, како што рече, тој има селективен пристап кон охриѓани.
– За некои охриѓани тој е човек кој руши дивоградби, а за други кои се моќни, кога треба да им руши нешто на нив, вели дека стравува за неговиот живот и таквиот селективен однос ги прави нерамноправни граѓаните на Охрид, истакна Милошоски.
Извршниот одбор на партијата синоќа ја утврди првата група на кандидати за градоначалници со кои ќе настапи на локалните избори во октомви годинава.
Актуелниот градоначалник Константин Георгиевски е дел од триесетте кандидати на СДСМ коишто влегуваат во трката за нов мандат.