Да се најде начин за интегрирање на Специјалното јавно обвинителство во редовниот судски систем на државата и да се воспостови одговорност за сите минати, сегашни, но и идни случаи каде што има корупција, порача денеска амбасадорот на Холандија Ваутер Пломп.
Тој уште еднаш повтори дека владеењето правото и носењето на законот за СЈО е од суштинска важност за Македонија да добие датум за почеток на преговори за членство во Европската унија и ги повика сите партии да покажат одговорност .
„СЈО направи добра работа со обвиненијата за висока корупција. Ние мислиме дека е многу важно високата корупција да продолжи да се гони, а тоа се однесува и на оваа во минатото и во сегашноста и во иднина. Затоа е важно да се најде ефикасен начин за СЈО да се инкомпорира во Основното јавно обвинителство (ОЈО), но да задржи дел од независноста. За носењето на овој Закон е потребно двотретинско мнозинство и затоа ги повикуваме сите политички чинители да најдат конструктивно решение – сите партии во Владата но и оние кои се надвор од Владата. Мислам дека и опозицијата мора да покаже одговорност за ова прашање“ рече Пломп, кој денеска во паркот во Чаир заедно со градоначалникот на Општина Чаир Висар Ганиу возеа велосипед за да се промовира толеранцијата и соживотот.
Опозицијата бара истрагите кои СЈО ги отвори по истекот на рокот за обвиненија во јуни 2017 година да бидат запрени. Меѓу овие предмети е и случајот „Талир“ за незаконското финансирање на ВМРО ДПМНЕ. По барање на СЈО, Судот за овој предмет го замрзна имотот на партијата.
Во Талир се обвинети поранешниот претседател на партијата Никола Груевски, поранешниот генерален секретар на партијата Кирил Божиновски, поранешниот министер за транспорт и врски Миле Јанакиески, како и пратеникот Илија Димовски, Леко Ристоски.
Министерката за правда Рената Дескоска неколкупати повтори дека ваквото барање на ВМРО ДПМНЕ не може да се прифати затоа што тоа значи амнестија на криминалот.