Крајот на сезоната ќе биде и крај на кариерата. По 20 години меѓу стативите, еден од најдобрите голмани на денешницата, Петр Чех (36) реши да се повлече од најважната споредна работа во светот. Одлуката на чешкиот голман е очекувана со иоглед на возраста, но и фактот дека освои се што можеше да освои во изминатите две децении.
„Ја играм 20 сезона како професионален играч. Толку поминаа од потписот на првиот професионален договор во мојата кариера. Мислам дека е вистинско време да навестам дека на крајот на сезоната се повлекувам“, објави Чех.
Во текот на кариерата тој бранеше за Бишани, за Спарта Прага, за Рен, за Челзи и за Арсенал. При објава на одлуката, Чех истакна дека ќе продолжи да работи напорно на тренинзите на „топчиите“ со надеж дека ќе освои макар уште еден трофеј до крај на сезоната.
„Настапувајќи 15 години во Премиерлигата го освоив секој трофеј што можеше да се освои. Мислам дека постигнав се што посакував“, дополни „единицата“ на Арсенал.
Чех на Островот пристигна во летото во 2004 година по трансферот од Рен во Челзи. Со екипата од „Стемфорд Бриџ“ освои вкупно 13 трофеи од кои еден во Лигата на шампиони и четири во Премиерлигата. Клупски рекордер е на „сините“ по бројот на меќеви без примен гол. Неговата мрежа беше мирна во 228 средби што е за 20 повеќе од претходното најдобро остварување на Англичанецот Питер Бонети во периодот меѓу 1960 година и 1979 година. Најсериозниот предизвик во кариерата го имаше во 2006 година, но не беше од спортски причини туку од здравствени. По судирот Стивен Хант во мечот со Рединг, Чех се здоби со сериозни повреди на главата по што мораше да носи заштитна маска со која настапува и денеска.