Министерството за одбрана склучи договор вреден 964.000 евра за изградба на станбен објект од проектот „АРМ мој вистински дом“. Тендерот го доби фирмата Инженеринг од село Желино, која треба зградата да ја изгради во рок од 15 месеци.
Министерството за одбрана овој проект го ветува уште од далечната 2010 година, а дури по шест години, во предизборието реши да го реализира.
Министерот Јолевски е трет министер кој го најавува „АРМ мој вистински дом“, а самиот тој во последната година направи неколку презентации пред војниците во повеќе касарни и го најавуваше проектот дека ќе почне со реализација поодамна.
Пред десет дена Јолевски повторно објави дека деновиве ќе биде поставен камен темелник на првата зграда од 32 стана зад касарната Илинден.
„Досега се имаат пријавено над 250 припадници на Армијата кои се заинтересирани да го решат своето станбено прашање преку овој проект и во текот на следната година ќе почне изградбата на сите преостанати станови за реализација на овој проект. Конкурсот за пријавување ќе остане отворен перманентно и единствен лимит ќе биде да се собере доволен број на заинтересирани за да има нова зграда за градење“, изјави Јолевски на 2 септември годинава.
Според конкурсот, становите ќе се купуваат по градежната цена на станот, а ќе се отплаќаат на 240 месечни рати. Купувачите ќе треба да обезбедат 20 проценти учество, а според некои проценки за еднособен стан за 35 квадрати ратата ќе биде околу 4.500 денари месечно, а за најголемиот стан од 90 квадратни метри ратата ќе биде околу 10.000 до 11.000 денари.
Како што е се поизвесно е дека ќе има избори на 11 декември, така се подобруваат и условите за купување на становите. Минатата година во октомври Јолевски рече дека учеството за станот ќе биде 30 проценти од цената, а сега војниците ќе треба да дадат 20 проценти од сумата за станот. А, изградбата на првата зграда тогаш најави дека ќе почне да се гради на почетокот на годинава.
Војниците гледаат со недоверба на овој проект на Министерството за одбрана, зошто се повторува пред секој изборен циклус.
Аднан Алитов од Независниот синдикат на професионални војници вели дека овој проект е само предизборен политички маркетинг, бидејќи истите ветувања биле дадени во 2010 година.
„Кои станови ќе се доделат кога становите ги нема нигде. Зошто мора со вакви игри предизборно со нас вработените да играат. А, второ ако се толку моќни со средства првин нека видат во касарните дека нема вода, нема храна, вработените одат на работа само со една униформа“, вели Алитов.
Првиот објект, според најавите од Јолевски, ќе се гради во близината на касарната Илинден, а доколку има интерес ќе се продолжи со градби и во другите градови.