Со развластувањето на најдолговечниот балкански владетел Мило Ѓукановиќ, Црна Гора, меѓу другото, ја отстрани и најголемата пречка за нејзиниот влез на Отворениот Балкан, пишуваат српските медиуми. Новоизбраниот претседател на Црна Гора, Јаков Милатовиќ, изјави дека регионалните економски интеграции се нераскинлив дел од евроинтеграциите и најави дека идната влада, која Црна Гора ќе ја добие по изборите на 11 јуни, ќе се занимава со приклучување кон Отворен Балкан.
Претседателот на Центарот за проучување на глобализацијата од Србија, Дејан Милетиќ, за српски Курир вели дека влезот на Црна Гора во Отворен Балкан е пред се во интерес на нејзините граѓани.
„Мислам дека тоа ќе биде еден од првите добри потези што ќе ги преземе Црна Гора по победата на Милатовиќ. Оваа иницијатива нема ограничувања и е проект поддржан од Америка, а знаеме дека американското влијание во Црна Гора е доста изразено. Нема оправдување овој проект да не заживее во уште поголем капацитет. Економијата и соработката во регионот се приоритет на сите регионални држави, бидејќи во услови на криза, ако не сме подготвени да соработуваме и да си помагаме, ќе бидеме многу послаби. Мислам дека таа свест постои и кај Милатовиќ“, рече Милетиќ.
И Никола Перишиќ од Центарот за социјални истражувања на Србија е убеден дека се значително зголемени шансите Црна Гора да се приклучи на оваа регионална иницијатива.
„Клучната причина зошто Црна Гора досега не се приклучи на Отворен Балкан беше стравот дека може да дојде до регионалната моќ на Србија и стагнацијата на црногорската европска интеграција. Сепак, со победата на поумерена политичка опција на претседателските избори и предвидувањата дека сличен исход ќе има и на јунските парламентарни избори, се зголемуваат шансите Црна Гора годинава и официјално да се приклучи на Отворен Балкан. Дека новата влада во Црна Гора сериозно размислува да се приклучи кон Отворен Балкан, говори и фактот што премиерот Дритан Абазовиќ присуствуваше на одредени настани во рамките на таа иницијатива“, анализира тој.
Перишиќ објаснува дека влезот на Црна Гора би бил важен за натамошниот развој на Отворен Балкан, бидејќи Црна Гора е најблиску до влез во ЕУ од сите земји во регионот кои ги почнаа преговорите.
„Тоа ќе биде дополнителен сигнал до ЕУ дека земјите од регионот можат да развијат добрососедска политика и дека имаат проактивна желба да го забрзаат својот европски пат. Исто така, интеграцијата на другите земји од Западен Балкан во Отворен Балкан всушност би била целосна имплементација на берлинскиот процес, кој Брисел го започна уште во 2014 година. Од друга страна, самата Црна Гора ќе има економски придобивки од приклучувањето кон Отворен Балкан, бидејќи поради кризата со Ковид и конфликтите во Украина, има негативни трендови во туризмот, кој беше главна економска гранка“, вели Перишиќ.