Најголемата бразилска фудбалска ѕвезда во моментов, Нејмар, ги критикуваше условите за игра на Естадио Ернандо Силес во Ла Паз, по синоќешниот натпревар против Боливија на гости, поради високата надморска височина.

Фудбалерите на Бразил по завршниот сигнал на судијата, синоќа по нерешниот натпревар во рамките на квалификациите за Светско Првенство, кој заврши 0-0, веднаш заминаа во соблекувалната каде примаа кислород од боци.

Ла Паз се наоѓа на 3.650 метри надморска височина и  е главен град на Боливија.

„Нехумано е да се игра во такви услови. Теренот, височината, топката, се беше лошо. Но задоволни сме од нашиот настап и покрај условите“, напиша на Инстаграм ѕвездата на ПСЖ на објава пропратена со фотографија.

Тренерот на фудбалската репрезентација на Бразил пак, Тите, осврнувајќи се на истиот проблем, им се заблагодари на медицинските лица за поддршката која им ја дале на своите репрезентативци.

„Настапот изненади. Играта овде е многу тешка. Стратешки гледано, среќен сум. Бевме диркетни и офанзивни“, рече меѓу другото Тите, упатувајќи благодарност до медицинскиот тим на Бразил.