Американскиот Центар за контрола и превенција на болести соопшти дека Норвешка од вчера е преселена во категоријата земји со најголем ризик за патување (категорија 4).
Оваа скандинавска земја од викендот ги ублажи повеќето од ограничувањата поврзани со ковид-19. Соседните земји Шведска и Данска во категоризацијата на ЦДЦ се сместени во нивото 3. Од Источна Европа, на нивото 4 од вчера се најде и соседна Бугарија.
Согласно критериумите на ЦДЦ, во категоријата земји со „многу висок ризик“ на ковид-19 се ставаат оние што во последните 28 дена имале над 500 случаи на 100.000 население.
ЦДЦ препорачува луѓето да избегнуваат патувања во земјите кои се означени како високоризични. Секој што, сепак, ќе одлучи да патува во овие земји треба да се вакцинира. Речиси 90 дестинации во светот во моментот се наведени како високо ризични.
„Целосно вакцинираните патници се со помала веројатност да пренесат ковид-19. Меѓутоа, меѓународните патувања претставуваат дополнителни ризици, па дури и целосно вакцинираните патници може да бидат изложени на зголемен ризик од инфекција и евентуално ширење на некои варијанти на ковид-19, пренесе „Си-Ен-Ен“.