По чистата препорака за пристапни преговори со унијата, Владата подготвува нов план „18“, што ќе биде фокусиран на она што треба да се стори до јунскиот Самит, кога земјава очекува да добие датум за почнување на преговорите.
„Фокусот сега ќе биде ставен на хармонизација на македонското законодавство со европската легислатива, но секако и на политичките и економските критериуми. Над 90 проценти од Планот 3-6-9 се реализирани“ рече Османи.
Османи рече дека во целиот процес на спроведување на планот 3-6-9 биле земени во предвид ставовите на граѓанските организации. Како пример го посочи Законот за бесплатна правна помош кој не беше донесен.
„Експертската јавност понуди амандмани на над 53 проценти од содржината на Законот и тој е доказ дека мнозинството нема да ја наметнува својата волја, дека мнозинството ќе го консултира цивилното општество во евроинтегративниот процес“ рече Османи.
Во процесот на донесувањето на реформските закони, посочи дека не бил постигнат генерален консензус со опозицијата и оти се преговарало фрагмантирано на различни теми, при што досега е постигнат успех и прифатени се голем дел на нивните забелешки.
Вицепремиерот за европски прашања смета дека Извештајот на ЕК во кој Македонија доби чиста препорака за почнување преговори за членство е патоказ кој покажува во кој правец треба да се движиме.
„Во Извештајот има позитивни, но и негативни забелешки, а нашата нова цел е мошне блиску. Тоа е јунскиот Самит на ЕУ каде очекуваме да добиеме датум за почеток на преговорите“ рече Османи.
Директорот на Евротинг, Љупчо Петковски кажа дека разликата од изминатите десет години кога се објавуваше Извештајот на ЕК, е тоа што живееме во еден поинаков контекст.
„На граѓаните не им значи тоа дали имаме чиста и неусловена или условена препорака, на граѓаните им значи тоа што три години по страшната политичка криза и една година по обидите ние да бидеме десороизирани, во Македонија конечно почнаа да се решаваат проблемите и предизвиците. Имаме чувство дека сега имаме Влада која покажа иницијатива и подготвеност да ги решава тие проблеми и која покажува проактивност“ рече Петковски.
Во врска со Извештајот напомена дека во него освен позитивните забелешки, Македонија е претставена и како земја во која „не тече мед и млеко“ и додаде дека документот и препораката се почеток на еден пат кој ќе биде долг и напорен.
Фани Каранфилова Пановска од Институтот Отворено општество, нагласи дека и покрај тоа што е формулирана како безусловна, во Извештајот има услов, а тоа е посветеност на реформите – во сферите за владеењето на правото и човековите права, економското управување и пред се управувањето со јавните финансии.