Владата на Република Албанија го промени проектот на патот Елбасан – Ќафасан, кој е дел од Коридорот 8, додавајќи изградба на уште еден тунел долг 3 километри.
Министерката за инфраструктура и енергетика на Република Албанија Белинда Балуку изјавилa дека ова решение е постигнато по преговори меѓу владите на Албанија и Северна Македонија, односно одговорните министерства за инфраструктура.
– Ова е важен дел од 8-тиот коридор, кој започнува од селото Лабинот (Елбасан) и продолжува во должина од 44 километри по пат со сите параметри на модерен автопат во однос на безбедносните услови и продолжува до кај Ќафасан. По интензивен разговор со владата на Северна Македонија, решивме да ја смениме излезната точка, бидејќи изградбата на Коридорот 8 е веќе подолго време започната од страната на Северна Македонија. По преговори со двете министерствата дојдовме до резултат дека е подобро да има поблиска излезна точка на албанска територија која ќе се решава преку тунел од 3 километри, изјавила Балуку.
Заменик-министерот за транспорт и врски на Северна Македонија, Берким Реџепи, во изјава за „Фронтлајн“ вели дека по консултациите меѓу двете министерства вклучени во градежниот проект на Коридорот 8, како и консултациите со претпријатијата за државни патишта, договорено е проектот да претрпи измени во делот на Албанија, поточно да се додаде тунел од 3 километри.
– По интензивни разговори меѓу надлежните органи на двете земји, одлучено е да се смени излезната точка на Коридорот 8 во делот на Албанија. По консултации, договоривме излезна точка на територијата на Албанија да биде преку тунел долг 3 километри, изјави заменик министерот Реџепи.
Зделката за проектирање и изградба на Коридорот 8 ја доби Бехтел-Енка, американско-турски конзорциум. Уште во 2021 година Собранието, по скратена постапка, донесе закон за изградба на автопати без распишување тендер.
Транснационалната транспортна оска Исток-Запад (Коридор 8) се протега од пристаништето Бари во Италија до пристаништата Варна и Бургас во Бугарија. Централниот дел на овој паневропски коридор долг 315 километри минува низ Северна Македонија, односно Кичево, Скопје, Куманово, Бељаковце и Крива Паланка. Меѓутоа, врските недостасуваат на западниот крај (од Кичево до границата со Албанија) и на источниот крај (од Куманово до границата со Бугарија).
Коридорите 8 и 10д, се досега најголемиот инфраструктурен проект во Северна Македонија. Со реализацијата на овој проект, предвидена е изградба на четири автопатски делници, во вкупна должина од околу 110 километри. Изградбата на овие два коридори, според Владата, значи поврзување на државата со другите земји од Европа, пораст на странски инвестиции, економски развој на земјата, побрз трансфер на луѓе и стока, развиен туризам и пред сè безбедни и сигурни патишта за граѓаните.
Дестан Јонузи
Извор: Фронтлајн