Денеска во Собранието пратениците ќе расправаат по предлогот за завршната сметка на буџетот на Република Македонија. Расправата ќе ја одржат сами бидејќи опозицијата ја блокира работата во Собранието. Според излагањето на министерот за финансии Кирил Миновски, власта лани потрошила повеќе одошто имала. Во буџетот се слеале 160 милијарди денари, а се потрошиле 180 милијарди. Дефицитот, според Миновски, ќе изнесува 19 милијарди евра, а долгот е 38 проценти од БДП.
Пред десетина дена власта сама го донесе и ребалансот на буџетот за 2016 година поради пад на проекцијата за раст на БДП од 4 на 2,6 проценти. На прес конференцијта во владата министерот за финансии Кирил Миновски смируваше дека, сепак, пари за плати, пензии и социјални трансфери ќе има и дека од капиталните проекти не се отстапува.
Ќе се намалат и приходите на буџетот за три милијарди денари, а расходите, односно трошењето ќе се намали за 804 милиони денари.
Буџетскиот дефицит се зголемува од 3,2 на 3,6 проценти од БДП и ќе изнесува 2,1 милијарди денари.
Миновски иако не одговори конкретно на новинарското прашање дали ќе се издава еврообврзницата, сепак сугерираше дека тоа е многу веројатно сценарио. Тој рече дека на тој начин ќе се сервисирале заостанатите обврски по основ на доспеани кредити и обврзници.