Од епидемиолошката анкета нема детали каде девојката се заразила, дали веќе лекарите утврдиле и кластер на луѓе од веселба или од некој друг настан.На Универзитетската Клиника за неврологија велат дека пациентите со церебрална парализа и со други хронични заболуавња имаат поголем ризик од компликации при инфекција со ковид-19
25-годишна девојка од Демир Капија е една од последните најмлади жртви на ковид-19 во земјава, а меѓу 30те починати кои вчера влегоа во црната статистика, е и скопјанка на 43-годишна возраст, која исто така, фатално завршила од компликации од коронавирусот.
Според податоците на Институтот за јавно здравје на РСМ, во Демир Капија досега се регистрирани 406 заболени и 12 починати од коронавирусот.
Девојката (25) која завчера починала од компликации од ковид-19 била лице со церебрална парализа и не била вакцинирана. Од епидемиолошката анкета нема детали каде девојката се заразила, дали веќе лекарите утврдиле и кластер на луѓе од веселба или некој друг настан.
На Универзитетската Клиника за неврологија велат дека пациентите со церебрална парализа и со други хронични заболуавња имаат поголем ризик од компликации при инфекција со ковид-19.
– И пациентите со церебрална парализа, како и со други хронични заболувања, се во ризична група и за нив треба задолжителна вакцинација против ковид-19. Овие пациенти често имаат и епилепсија, парализа…Бидејќи тие се и тешко подвижни, односно најчесто се во инвалидска количка, па и белите дробови кај овие пациенти не им се вентилираат добро, што исто така е ризик-фактор – вели д-р Иван Барбов, директор на Клиниката за неврологија.
Оваа установа од пред две недели е повторно ковид центар.
– На Клиниката сега се хоспитализирани 29 пациенти заболени од ковид-19 кои се со средно тешка клиничка слика. Многу е важно за сите, а особено за лицата со хронични заболувања, да се вакцинираат против коронавирусот и да ги почитуваат мерките на заштита – носење маска, држење дистанца. Исто така, пациентите кои ќе заболат од ковид-19 да не чекаат да им се искомпликува здравствената состојба, па потоа да се јават на преглед кај матичниот лекар или во ковид центар – нагласува д-р Барбов.
(Љ.Б.)