Почна скринингот за ковид-19 во неколку основни училишта во Скопје – досега се добиени пет илјади согласности од родители.
Едно од училиштата каде се проверува има ли и колку ученици се инфицирани со ковид-19 е и ОУ „Блаже Конески“ во општина Аеродром каде во моментов екипи на Центарот за јавно здравје тестираат околу 150 ученици.
– Скринингот се одвива без проблеми, дојдоа екипи од Центарот за јавно здравје и земаат брис од учениците чии родители дадоа согласност за тестирањето, ни изјавија од основното училиште „Блаже Конески“.
Скрининг за ковид-19 во ОУ „Блаже Конески“ во Аеродром
Од Министерството за здравство информираат дека е завршена е првата фаза во однос на добивање и обработка на согласностите од родителите.
– Голем е интересот за учество во скринингот и досега се добиени околу 5.000 согласности од родители на деца во основните училишта во Скопје, велат од Министерството.
Врз основа на добиените согласности, направен е план и распоред за реализација на скринингот на терен и тој веќе се врши во неколку основни училишта во Скопје. Скринигот продолжува в понеделник.
Во рамки на првата фаза ќе бидат опфатени училиштата на територија на град Скопје, а ќе бидат вклучени медицински екипи од Центарот за јавно здравје и Здравствениот дом Скопје.
Сите активности за спроведување на скринингот се одвиваат во постојана координација со Министерството за образование и наука.
(Љ.Б.)