Обвинетиот експремиер и лидер на ВМРО-ДПМНЕ Никола Груевски во судницата во Основниот суд Скопје 1 ги кажа личните податоци, со што по многу одложувања почна судењето за насилствата во општина Центар и за шамарите што ги нарачувал за тогашниот градоначалник Андреј Жерновски.
По него зборуваше и екс министерот за транспорт Миле Јанакиески, кој рече дека нема лична карта, ниту пасош, бидејќи како што рече му се задржани во судот.
Судијката Татјана Михајлова од Основниот суд Скопје не го одложи денешното рочиште, како што бараше одбраната и го прифати барањето на обвинителката Фатиме Фетаи, која предупреди дека никогаш нема да се соберат сите обвинети и судењето да почне и донесе решение да го издвои Димче Крстев кој утрово беше стражарно приведен по наредба на Михајловска.
Оваа постапка на Михајлова предизвика изненадување и вознемиреност кај првообвинетиот Никола Груевски и кај сите останати 13 обвинети и адвокатите кои денеска дојдоа комплет.
Михајлова му рече на Крстев: „Одете си дома Димче ако не ви е добро. Слободен сте. Ќе бидете повикан во друга постапка против вас, за истото обвинение”.
Михајлова рече дека против нејзината одлука Крстев да се издвои од оваа постапка и судењето за насилствата и нарачаните шамари за Жерновски, нема право на жалба.
Во судот освен Груевски и Јанакиески, присутни се и пратеничката Даниела Рангелова и останатите обвинети во овој случај. Присутни се и Андреј Жерновски и Саша Богдановиќ како оштетени лица во овој случај
Претходното рочиште беше одложено поради тоа што Димче Крстев и Милан Андоновски не беа присутни на судењето.
Овој случај се однесува на протестите во оваа општина против, како што велеа тогаш демонстрантите, рушење на црквата Свети Константин и Елена. Протестите резултираа со демолирање на општинската барака, упад на демонстранти во седница на советот и упатување закани кон советниците.
Според објавената прислушуван разговор што го објави Зоран Заев, протестите биле во организација на ВМРО-ДПМНЕ, а Груевски побарал еден од демонстрантите да му удри шамар на градоначалникот, Андреј Жерновски.