Обвинителот Бурим Рустеми од Специјалното јавно обвинителство пристигна во Обвинителството за организиран криминал, каде треба да даде исказ за случајот „Рекет“.
Рустеми беше повикан да сведочи во ЈО вчера, но неговото сослушување беше одложено поради рочиштето за предметот „ТНТ“, каде тој го застапува обвинението.
Во Обвинителството за организиран криминал од почетокот на неделава искази за случајот „Рекет“ дадоа специјалните обвинителки Лиле Стефанова и Елизабета Јосифовска.. Во вторник на распит е повикана и шефицата на СЈО Катица Канева.
Стефанова и Јанева беа спомнати во снимените разговори и видеата што ги објави интернет изданието на италијанскиот весник „Ла Верита“, а во врска со случаите „Рекет“ и „Империја“. Во вторник во Обвинителството е повикана и Катица Јанева.
Јанева се заканила на обвинителите во СЈО: Ако не ме браните ќе измислам работи за вас
Од Основното јавно обвинителство за гонење организиран криминал и корупција, вчера соопштија дека во овој случај во тек е финансиска истрага во повеќе насоки и прибирање доказен материјал што ќе помогне во утврдувањето на фактичката состојба.
Исто така дел од одземените електронски уреди се вештачат, а за дел се прават напори за декриптирање на пронајдените содржини, велат од Обвинителството.
Обвинителството ги одзеде мобилните телефони на Специјалната јавна обвинителка Катица Јанева, но едниот од телефоните беше форматиран и на него немаше никакви сочувани податоци.
Од Основното јавно обвинителство за гонење на организиран криминал и корупција уште наведуваат дека во интерес на постапката нема однапред да споделуваат информации за дејствијата што ги преземаат во предметот, па така и за лицата што се повикани или има во план да бидат повикани да дадат исказ и ќе споделуваат информации што нема да наштетат на понатамошната постапка.
Истрагата за „Рекет“ во Јавното обвинителство ја води шефицата на организиран криминал Вилма Рускоска.
Засега единствените осомничени за случајот „Рекет“ Бојан Јовановски и Зоран Милески остануваат во притвор, откако вчера Кривичниот совет при Основниот кривичен суд им ја продолжи мерката за уште 30 дена.
Бојан Јовановски и Зоран Милески, Обвинителството ги товари за кривично дело „примање награда за противзаконито влијание“, а првоосомничениот Јовановски и за „перење пари и други приноси од казниво дело“.