Градоначалничката на Град Скопје, Данела Арсовска, градоначалникот на општина Ѓорче Петров, Александар Стојкоски и директорот на ЈП Улици и патишта, Борис Настов, денеска на прес конференција во населеното место „Кисела Јабука“, го најавија започнувањето на градежната офанзива во Скопје, во чија прва фаза е предвидена реконструкцијата на над 20 општински улици во општината Ѓорче Петров.
„Денеска започнуваме со реконструирање на повеќе од 20 улици во општина Ѓорче Петров. Станува збор за улици кои досега не биле асфалтирани, односно за првпат се асфалтираат на барање на граѓаните да добијат улици и услови какви што заслужуваат. Градот Скопје за оваа меѓуопштинска соработка одвојува 4 милиони денари“, истакна Арсовска.
Градоначалничката појасни дека во оваа прва фаза ќе се пристапи кон реконструкција на улици во пет населени места во оваа општина и тоа во село Волково, Кисела Јабука, Даме Груев, Ново Село и Стопански Двор.
„Можеме да зборуваме за современ град само ако се обидеме за сите да обезбедиме соодветни услови, да не биде како досега односно да нема повеќе заборавени населби. Програмска определба е во Скопје да нема заборавени населби кои многу долго се оставени без соодветен развој, а за подобрување на таа слика започнуваме денеска со градежната офанзива, за рамномерен развој во урбаниот и руралниот дел на Скопје“, вели Арсовска.
Реконструкција ќе има на улиците во село Волково и тоа улица 83, улица 100 десен крак, улица 3, 73, 74, 78, улица 80 Пржина, улица 81 крак 1, 2, 3 лево, улица 81 крак 4 десно. Во Кисела Јабука улиците 4, 6, краците на улицата 46 и 46а и улиците 68, 10 и 34. Улицата Антон Кецкаров во населено место Даме Груев, во Ново Село пред училиштето крак десно, крак лево и краците на улиците 4 и 2, како и улица 52 десен крак во населба Стопански Двор.
Градоначалникот на општина Ѓорче Петров, Александар Стојкоски рече дека оваа акција е во интерес на над 20 илјади жители кои живеат и гравитираат на овој дел од општината, каде повеќе од неколку децении не се реализирани барањата на граѓаните.
Директорот на ЈП Улици и Патишта, Борис Настов посочи дека од вчера е започнато да се работи на подготовка на асфалтирање на улиците во населбата „Кисела Јабука“ со ископ на гребен асфалт, потоа со поставување на тампон слој и уште денеска ќе се пристапи кон асфалтирање со нова асфалтна маса.
Вкупната површина на улиците кои ќе бидат асфалтирани е над 16.000 квадратни метри, со променлива широчина на улиците од 3 до 5 метри, со што ќе се подобрат условите на живеење на граѓаните кои живеат тука, а воедно ќе се влијае и на подобрување на безбедноста во сообраќајот, истакна Настов. (Р.Н.)