Во Кривичниот суд денеска треба да се одржи рочиште за предметот на СЈО „Тотал“, во кој е осомничен новинарот Драган Павловски-Латас за даночно затајување.
Предметот „Тотал“ се однесува на даночно затајување од страна на Латас како сопственик и управител на фирмите за маркетинт и конслатинг услуги „Тотал“ ДООЕЛ Скопје, „Медиамакс“ и „Тотал Медиа Центар“ ДООЕЛ Скопје.
Осомничениот се товари дека за даночните години од 2008 до 2015, со намера тој и правните лица да одбегнат плаќање даноци во завршните сметки и даночните пријави давал лажни податоци. Правните лица го оштетиле буџетот за 121 илјади евра, а физичкото лице за 63 илјади евра.
Како што изјави обвинителката Фатиме Фетаи осомничениот си купувал мебел од 65.000 евра, душеци од 3.000, рачен часовник „брајтлинг“ од 2.300 евра, персиски теписи и врвно дизајнирани кујнски садови.
Три од фирмите кои се под истрага во овој случај воопшто немале вработени што би ја користеле опремата, а четвртата имала само двајца вработени, кои биле ангажирани дури во 2014 и во 2015 година.
Специјалното јавно обвинителство на 18 октомври го примило известувањето од скопскиот Кривичен суд дека е прифатен обвинителниот акт за случајот „Тотал“.