Соработката меѓу земјите од Западен Балкан и со Европската Унија на планот на (не)пропустливоста на мигрантите од конфликтните подрачја на Блискиот и Средниот Исток, ги дава очекуваните резултати. Мешовитите контроли составени од припадници на полициите од земјите на таканаречената ,, Балканска рута“ меѓу кои е и Македонија, и од земјите на ЕУ ја оправда одлуката за нивно формирање. Имено, ако во претходните десет години ЕУ регистрирала 2,3 милиони илегални преминувања на нејзина територија, што во просек годишно значи околу 200.000 мигранти, последната година тој број изнесува 114.300 преминувања, главно од Авганистан.
Но, далеку од тоа дека ЕУ е заедница која само ги одвраќа мигрантите. Дека е така, говори и фондот за барателите на азил кој до 2027 е зголемен и изнесува фантастични 22,7 милијарди евра.Во претходното десетлетие, Унијата на програмата за азил потрошила околу 10 милијарди евра.
Моменталниот број во светот на ,, талкачките луѓе“ како што се нарекуваат мигрантите, изнесува околу 80 милиони. Исто толку човечки судбини и нереализирани сонови и планирања,мажи, жени и деца, нечесто го губат својот живот на некоја од маршрутите по копно и вода на патот до некоја од ,,ветените земји“. Бројот на ,,талкачките луѓе“ во светот изнесува колку вкупниот број на мажи, жени и деца во Германија, пресметале статистичарите. Децата во вкупната мигрантска популација во глобални рамки, претставуваат 40 одсто.
Мигрирањето секогаш не е поради вооружени конфликти, луѓето се решаваат на нелегални влегувања во одредени земји, поради разно-разни причини од прогонувања, војни, климатски непогоди до еколошки катастрофи. Економската причина за мигрирање не е меѓу приоритетните.
Земји со најголем број на бегалци на својата територија се Турција, Пакистан, Уганда, Судан и Германија. Само 14 одсто од земјите каде има бегалци,влегуваат во групата,,развиени“. 15 милиони луѓе свое прибежиште нашле во Турција, Сирија, Авганистан и Венецуела, додека 1,1 милион во Германија.
Интересно е што 38.000 луѓе успеале да ,,допливаат“ до Канарските острови, барајќи да заминат преку Океанот. На тој пат околу 4.000 илегални мигранти го загубиле животот во обид да го поминат Медитеранот.
Во моментов во фасциклите на ЕУ има 1,5 милиони барања за азил.
Мирјана Трпческа