Судот во Шпанија вчера одобри судење на колумбиската поп пејачка Шакира под обвинение за даночна измама.

Шпанското обвинителство ја обвини пејачката во 2018 година дека не платила данок на приход остварен помеѓу 2012 и 2014 година. Обвинителството бара осумгодишна затворска казна и висока парична казна доколку биде прогласена за виновна за даночно затајување.

Шакира (45) во неколку наврати негираше дека сторила нешто лошо и го отфрли договорот што и го понудија властите за да избегне судење. Нејзината фирма за односи со јавноста соопшти дека таа веќе го платила сето она што го должи и дополнителни 3 милиони евра камата.

Судот со седиште во градот Есплугес де Лобрегат во близина на Барселона соопшти дека Шакира ќе се соочи со шест обвиненија за даночна измама. Датумот на судењето допрва треба да биде одреден.

Обвинителите во Барселона тврдат дека добитничката на Греми поминала повеќе од половина од тој период во Шпанија и требало да плати данок во земјата, иако нејзината официјална резиденција била на Бахамите.

Шакира, чие полно име е Шакира Изабел Мебарак Рипол, е поврзана со Шпанија откако почна да се забавува со фудбалерот Жерар Пике. Парот, кој има две деца, порано живееше заедно во Барселона, но неодамна стави крај на 11-годишната врска.

Шпанија во изминатата деценија ги судеше и фудбалските ѕвезди како Лионел Меси и Кристијано Роналдо затоа што не го платиле целосниот данок. Тие беа прогласени за виновни за затајување, но и двајцата избегнаа затворска казна благодарение на одредбата која му дозволува на судијата да се откаже од казни под две години за оние кои првпат ќе ги прекршат. (Асошиетед Прес)