Времето денеска ќе биде сончево и многу топло со мала до умерена локална облачност. Ќе дува умерен до засилен ветар, претежно од југозападен правец. Максималната температура ќе биде во интервал од 35 до 43 степени Целзиусови, а УВ индексот ќе изнесува 9.
Според најавите од Управата за хидрометеоролошки работи (УХМР), во попладневните и во ноќните часови ќе има локален пороен дожд, грмежи и засилен ветар. Локално, процесите ќе бидат поинтензивни во форма на невреме, со пообилен дожд, електрични празнења, силен ветар над 80 километри на час и услови за појава на град.
Во Скопје ќе биде сончево и многу топло со мала до умерена облачност и со умерен до засилен ветар од југозападен правец. Во текот на ноќта ќе има пороен дожд, грмежи и засилен ветар. Минималната температура ќе биде околу 20 степени, а максималната ќе достигне до 40.
Утре ќе преовладува променливо облачно и посвежо време, претпладне со локален пороен дожд и грмежи. Ќе дува умерен, на места засилен ветар од северозападен правец. Потоа следува период на стабилно време. Утре и в сабота, дневните температури ќе бидат за 4 до 5 степени пониски од денешните, а од недела се очекува благ пораст на дневните температури.