На неколку места е излеана реката Вардар во Скопскиот регион. Излевање има по течението во центарот на Скопје, како и кај мостот кон Јурумлери во општина Аеродром и на местата викани Вител, Чука и Средоред во општина Зелениково, информираа од Центарот за управување со кризи.
Во останатите делови од државата на места поплавени се земјоделски површини.
Сепак, најзагрозен е северозападниот дел од државата.
Во општина Маврово и Ростуше над селото Жировница делумно е почнато да се лизга земјиштето и постои опасност тоа да се зголеми.
Во општина Боговиње, на патот за селото Ново Село има одрон во должина од пет метри и се очекува во текот на денот да почне чистењето. Во општина Јегуновце, поплавени се семјоделски површини, куќи и дворови во селата Раотинце, Сиричино, Туденце и Копанце.
Tреска поплави земјоделски површини и ливади во атарите на селата Лисичани, Пласница, Сувидол, Девич, Манастирец и Модриште.
Најновите хидролошки мерења покажуваат дека двојно е зголемен водостојот на реката Вардар кај Јегуновце, Зајчев Рид и Велес, а речеиси тројно на реката Треска кај Македонски Брод и на Сатеска кај Ботун.
Зголемување на нивоата во однос на мартовскиот просек има кај сите останати реки во државата, а најмалку кај Крива Река и Брегалница.
Кај езерата нема драстични промени во однос на мартовскиот просек.
Од вчера требаше и институциите надлежни во делот на превенција и справување со поплави да спроведат активности согласно заклучоците од последната седница на Управувачкиот комитет за координација и управување во системот за управување со кризи.
Од УХМР најавуваат врнежи и во следните денови, но со помал интензитет.
За денеска предвидуваат променливо облачно со подолги сончеви периоди. Ќе дува умерен до засилен ветер од југозападен правец. Кон крајот на денот во западните планински подрачја ќе има повремен слаб дожд.
Утринската температура ќе се движи од четири до осум, а дневната од 12 до 19 степени.
Во Скопје слично време, променливо облачно со сончеви периоди и со умерен повремено засилен југозападен ветер. Утринската температура ќе се спушти до пет, а дневната ќе достигне до 16 степени.
В четврток ќе има повремени врнежи од дожд, а на планините од снег. Ќе дува умерен до засилен северозападен ветер.
Од петок ќе настапи стабилизирање на времето со значително повисоки дневни температури, особено за време на викендот кога на планините ќе има забрзано топење на снежната покривка.