Поранешниот фински претседател и добитник на Нобелова награда во 2008 година, Марти Ахтисари се повлече од јавниот живот поради борба со Алцхајмеровата болест, соопшти неговата канцеларија.
Осумдесет и четири годишниот политичар се повлекува од сите јавни обврски, се наведува во соопштението.
Тој добивал секојдневна медицинска грижа во својот дом, а во некои случаи заминувал и на болничко лекување. Во соопштението се додава дека неговото семејство инсистирало да се почитува неговото право на приватност.
Ахтисари, кој беше претседател на Финска од 1994 до 2000 година, ја доби Нобеловата награда за мир во 2008 година за неговите напори како посредник во решавањето на конфликтите, особено во Индонезија, во Намибија, во Северна Ирска и на Балканот.
Тој ги набљудуваше преговорите за помирување во 2005 година меѓу индонезиската влада и сепаратистичките бунтовници од Движењето Слободен Ацех, како и патот на Косово кон независност.